ट्रम्प यांचा अणवस्त्र चाचणीचा मोठा इशारा: “अमेरिकेने पुन्हा टेस्टिंग सुरु केलं पाहिजे”
अमेरिकेचे माजी राष्ट्राध्यक्ष डोनाल्ड ट्रम्प यांनी अलीकडेच अणवस्त्र चाचणीबाबत मोठे विधान केले आहे. त्यांनी जाहीर केलं की अमेरिका लवकरच अणवस्त्र परीक्षणाची प्रक्रिया पुन्हा सुरु करण्याचा विचार करत आहे.
CBS News च्या “60 मिनिट्स” या कार्यक्रमात रविवारी दिलेल्या मुलाखतीत ट्रम्प म्हणाले, “रशिया आणि चीन अणवस्त्र चाचण्या करत आहेत, पण त्याबद्दल बोलत नाहीत. आपण एक खुलं समाज आहोत — इथे स्वतंत्र प्रसारमाध्यमं आहेत, म्हणून आपण या गोष्टी उघडपणे सांगतो. जर ते टेस्ट करत असतील, तर आपणही करणार. उत्तर कोरिया आणि पाकिस्तान सुद्धा अणवस्त्र परीक्षण करत आहेत.”
रशियाने नव्या अणवस्त्र चाचणीची घोषणा केल्यानंतर, जवळपास 30 वर्षांनी अमेरिका पुन्हा परीक्षण सुरु करणार असल्याच्या चर्चांवर ट्रम्प यांना विचारण्यात आलं. त्यावर त्यांनी सांगितलं, “रशिया, चीन आणि उत्तर कोरिया हे सर्व देश सक्रियपणे अणवस्त्रांची टेस्टिंग करत आहेत. आपण मात्र मागे राहिलो आहोत. अमेरिका अणवस्त्र परीक्षण न करणारा देश बनून राहू नये.”
अमेरिकेची पूर्ण तयारी
ट्रम्प यांनी पुढे सांगितलं की, “अमेरिकेकडे जगातील सर्वाधिक अणवस्त्रसाठा आहे. आमच्याकडे इतकी अणवस्त्रं आहेत की आम्ही जगाला 150 वेळा नष्ट करू शकतो. मी रशियाचे राष्ट्राध्यक्ष व्लादिमीर पुतिन आणि चीनचे राष्ट्राध्यक्ष शी जिनपिंग यांच्यासोबत अणवस्त्र निशस्त्रीकरणाबाबत चर्चा केली आहे.”
तथापि, त्यांनी चाचणीसाठी नेमका वेळ आणि ठिकाण उघड केले नाही. मात्र, “अमेरिका पूर्णपणे सज्ज आहे,” असं त्यांनी स्पष्ट केलं.
पाकिस्तानच्या अणवस्त्र चाचण्यांवरही आरोप
ट्रम्प यांनी मुलाखतीदरम्यान पाकिस्तानचाही उल्लेख केला. “पाकिस्तान त्या देशांपैकी आहे जे अणवस्त्रांची चाचणी सक्रियपणे करत आहेत,” असं ते म्हणाले.
यामुळे जागतिक पातळीवर अणवस्त्रांच्या शर्यतीची पुन्हा एकदा चर्चा रंगली आहे. भारताकडेही अणवस्त्र क्षमता असली तरी भारताची भूमिका शांततेची असून, तो अशा विषयांवर फारसं मतप्रदर्शन करत नाही. मात्र, पाकिस्तान मात्र अणवस्त्रांच्या चाचण्यांबाबत आक्रमक दृष्टीकोन ठेवत असल्याचं ट्रम्प यांच्या विधानातून स्पष्ट झालं आहे.
(adsbygoogle = window.adsbygoogle || []).push({});
