महिनाभरापूर्वी घेतलेली नवी फॉर्च्युनर ठरली अपघाताचे कारण? रील स्टार प्रतीक शिंदेवर गुन्हा, तीन गाड्यांचा चुराडा

इंदापूर (पुणे): सोशल मीडियावर रील्समुळे लोकप्रिय झालेला इंदापूरचा रील स्टार प्रतीक शिंदे एका भीषण अपघातामुळे चर्चेत आला आहे. पुणे–सोलापूर महामार्गावर झालेल्या या अपघातात एकाचवेळी तीन गाड्यांचे मोठे नुकसान झाले. सुदैवाने कोणतीही जीवितहानी झाली नाही; मात्र या घटनेनंतर प्रतीक शिंदेविरोधात भिगवण पोलीस ठाण्यात गुन्हा दाखल करण्यात आला आहे.

नेमकं काय घडलं?

पोलिसांनी दिलेल्या माहितीनुसार, मदनवाडी (सकुंडे वस्ती) परिसरात गुरुवारी सायंकाळी हा अपघात झाला. अकलूजचे निखिल बाळासाहेब होले हे त्यांच्या क्रेटा कारमधून प्रवास करत असताना पाठीमागून आलेल्या टोयोटा फॉर्च्युनरने त्यांच्या गाडीला जोरदार धडक दिली. धडकेचा वेग इतका होता की क्रेटा पुढे असलेल्या मारुती वॅगनआरवर आदळली. परिणामी तिन्ही वाहनांचे मोठे नुकसान झाले.

महिनाभरापूर्वी घेतली होती नवी फॉर्च्युनर

प्रतीक शिंदेने काही दिवसांपूर्वीच मोठ्या उत्साहात नवीन टोयोटा फॉर्च्युनर खरेदी केली होती. मात्र अवघ्या महिन्याभरातच या गाडीचा अपघात झाल्याने सोशल मीडियावरही मोठी चर्चा रंगली आहे. अपघातावेळी गाडी प्रतीक शिंदे स्वतः चालवत असल्याची माहिती समोर आली आहे.

गुन्हा दाखल; पोलिसांचा तपास सुरू

या प्रकरणी फिर्यादी निखिल होले यांच्या तक्रारीवरून भिगवण पोलीस ठाण्यात प्रतीक राम शिंदे (वय 24, रा. भादलवाडी, ता. इंदापूर) याच्याविरोधात गुन्हा दाखल करण्यात आला आहे. पोलिसांकडून अपघाताचे नेमके कारण आणि इतर बाबींचा तपास सुरू आहे.

वाहतूक काही काळ विस्कळीत

अपघातानंतर पुणे-सोलापूर महामार्गावर काही काळ वाहतुकीची कोंडी झाली होती. स्थानिक नागरिक आणि पोलिसांनी तातडीने मदतकार्य करत वाहतूक सुरळीत केली. या अपघातात कोणीही गंभीर जखमी झाले नसल्याने मोठी दुर्घटना टळल्याचे सांगितले जात आहे.