लोकेशन ट्रॅक होऊ नये म्हणून मोबाईल दुकानात ठेवला; लोहगड हत्या प्रकरणात नवा खुलासा
पुणे : लोहगड किल्ल्यावर (Lohgad Fort) व्यावसायिक केतन अग्रवाल (Ketan Agarwal) यांच्या मृत्यूप्रकरणी तपासादरम्यान आणखी एक महत्त्वाचा खुलासा समोर आला आहे. पोलिसांच्या माहितीनुसार, आरोपी चेतन चौधरीने आपले लोकेशन ट्रॅक होऊ नये म्हणून घटना घडण्यापूर्वी स्वतःचा मोबाईल एका दुकानात ठेवला होता. त्याऐवजी तो कर्मचाऱ्याचा मोबाईल घेऊन गेला आणि दिवसभर इंटरनेट सेवा बंद ठेवल्याचा दावा तपासात करण्यात आला आहे.
पोलिसांच्या म्हणण्यानुसार, 18 जून रोजी केतन अग्रवाल, त्यांची मंगेतर सिया गोयल (Siya Goyal) आणि चेतन चौधरी (Chetan Chaudhari) लोहगड किल्ल्यावर पोहोचले होते. सीसीटीव्ही फुटेजमध्ये हूडी घातलेला एक व्यक्ती त्यांचा पाठलाग करताना दिसल्याने संशय निर्माण झाला. त्यानंतर तांत्रिक तपास, कॉल रेकॉर्ड आणि डिजिटल पुराव्यांच्या आधारे पोलिसांनी चेतन चौधरीपर्यंत धागेदोरे जोडले.
तपासात असेही समोर आले आहे की, लोकेशनचा माग काढता येऊ नये म्हणून चेतनने स्वतःचा मोबाईल दुकानात ठेवला होता. त्या दिवशी त्याच्या क्रमांकावर आलेल्या कॉलना दुकानातील कर्मचाऱ्यांनी उत्तर दिल्याची माहितीही पोलिसांनी नोंदवली आहे.
या प्रकरणात सिया गोयल आणि चेतन चौधरी यांना अटक करण्यात आली असून, दोघांवर खून आणि कट रचल्याचे आरोप आहेत. मात्र, हे सर्व आरोप पोलिस तपासावर आधारित असून, न्यायालयात आरोप सिद्ध होणे अद्याप बाकी आहे.
